الأدب
أحلف والله 'بالعامية المصرية'
أحلف والله
ما كنت عايزة شيء غير بس أفرح
أعيش زي كل الناس
بس كنت عايزة يكون عندهم شوية إحساس
بس كنت عايزة يطلع عليَّ الصُّبح
تعَدِّي عليَّ نسمة هوا من غير ما تنداس
قلب اتوجع وكسر الخاطر كان غرَّاس
وأطلقت لحروفي كلها السَّراح
كل كلمة قاسية تتقال كانت مني تتباس
أمتص ألمي وكلي جراح
تعبت من دور شيل الجسر بشكل مدروس
لما يميل انتباه عندي أمر محسوس
لا يُمكن يُقع ومينفعش أرتاح
شغَّلي المكنة شيلتك حرَّكي التروس
اتحمِّلي ده اختيارك ف الأساس
هو فين الأساس راح؟
حد شاف إللي تاه من ورق الكرَّاس؟
الشِّدة والحنيَّة وعيون قلبي الحُرَّاس
إللي يلاقي الورق يجيبُه ممسوح
لا يقرا ولا يحكيلي مش مسموح
لا عايزة أشوف ولا أسمع أي دروس
اختبارات لمنهج صعب متروس
لأي وضع ومكان كان ممكن أروح؟
كل أمل جوايا وأدوه وكان مدبوح
نقاء الروح بقى ذنب هيفضل محبوس
وآهي كلها دروس ف دروس
معادلة صعبة نتيجتها مرفوض ترتاح
