اكتشفت اكتشاف خطير

كان ساعتها عقلي هيطير

طلعت ملكش لازمة

وجودك زي عدمُه وعامل أزمة

واتخَبَطت أنا ف صدمة

لازملَك علاج جزري

نَقل رجولة فِ الوريد

انعدمت النخوة والأثر كان عليَّ شديد

حتى العرض استَحَلُّه

وجُبنُه وغُبنُه كان بيزيد

دا اللي حج واعتمَر حصري

أَكَل حقي وعاب فِ أصلي

دا اللي كان عين ونني

وعَ الروس مِتشال بفضلي

دا اللي بكلامُه وفِعلُه خاني

دا اللي بالاحتيال سَكَنِّي

دا اللي ظن مَلَكني وعاش مِتهَنِّي

دا اللي كان بَترُه من حياتي هو حَلُّه

قلبي مستَوعِبش غِلُّه

انخدع فيه وافتَكَرُه خِلُّه

عَصَرُه وَجَعُه دا اللي حَصَلُّه

عذابي وألمي قوَّاني

وقتها أخدت قرار

إنك تتصلِح كان وهمي

وقَّفت ساعة الانتظار

عنيك شافت وقوفها

طقِّت نار على شرار

بصِّتلي وحلفِت لتقلبها دمار

وبدون إنذار

اخد حباية مُسَكِّن صاحبك الضمير

متوقعتش جحودك

مصَدَّقتش أد إيه مُخيف التغيير

محتاجين عُلما الحساب

وبتوع الهندسة يفيدونا بجواب

البرجل اتفتح رسم الدايرة تُلتمية وستين

استَمَر يرسم دواير تعلِن الانقلاب

وبدون رحمة إداني الضرب المتين

كان بيصيبني ف كل حِتة وخَبطُه بيِدمِي

كان أكتر مِ اللي عِشتُه معاه وعدد السنين

نزلِت دموع الأنين

مِش معقول دي كانت عِشرِة بني آدمين

وقت وكان بيقضيه

مَثِّل فيلم الأبريا والصالحين

ياما اتحَمِّلت أنا جمودك وبعادك وشرودك

خَبِّيت أنا همي

وعنِّي انت بالقصد كُنت مَعمي

وتعَدِّي وتفيض سنين غَمِّي

متفرحش وتقول كُنت فاتني

دا أنا شُفت عيوبك غمَّضت

وبإيدي قفلت باب سجني

عملت حكيمة زماني

قُلت هغَيَّرَك ولربَّك هرجَّعك

لكن المفاجأة بكل المقاييس غلبِتْني

عِرفِت فين يِوجَع ووَجَعِتْني

صِبِرت رغم إني عارفة غدرَك

وبمُنتَهى الطاعة وافقت أدفع التمن غالي

دفعت بكامل إرادتي أو بالغصب دا كان اختياري

من دمي اتبرعتلك كيس واتنين !

معملش حاجة !!

اديتَك كُلُّه عشان اتطهر مِنَّك وارتاح

كنت فاكرة هتخلص الحكاية

واستعوض ربي فِ اللي راح

محسبتش حساب لشيء

كل اللي عرفتُه وقتها

عقلي وقلبي تعبوا

وأخدت شهادة فشل بنجاح

كان شعور مُميت

راسي لَفِّت محسِّتش يمكن غِميت

أو يمكن رُعبي من أفعالك

خلاني هربت جريت

لكنه غَصب كله غصب

سلبت حقي روحي عمري غَصب

قطَّعت كل شريان يحييني غَصب

لحمي شفتُه ع الأرض بيتداس

سِكِت وسمعتُه بيصرخ غَصب

يا ويلك مِ اللي اتصلب

اترَفَع على عمود الغدر ومفجَّرش الغضب

قسوة كل القلوب جوَّاه

حالف لينتقم والعدل ياخد مجراه