هوه انت مين ..

يقدر في لحظه يحصلك

أو يوصلك

وانت اللي مرسل بالعنايه..

والرعايه من القدر

آه يا مشالي الحب

ياقمر العطاء الفزدقي

ياما صحيت الفجر

لاجل تقول لكل ديوك شبعنا شقشقي

ودخلت بينا لدير مقدس لاجل نتوضى ونسجد ع الحصا

وانت الإمام بجاكتتك..والبنطلون اللي مازال مدهون عرق

الله على المسك الإلهي والهلال لو يوم برق

كل اللي كان زيك غرق

في ألف مستنقع رزيله وبنكنوت.. وآبار طمع

الكل من جيب المريض ياما جمع

وانت اللي حطيت النقط فوق الحروف

دا لأنها ناقصه نقط

حاسس أمامك يا حبيب القلب بالعجز الطري

وبألف حاجه مخجله

محني..ولكن يا حبيب..

فارد في قامة كل واحد يلمسك

الرب كان بيحسسك..إنك نبي

مرسل لناس مش لاقيه لسه في اللضا

وتبص دايما ع الفضا

تلقى الإله باصص عليك

تغسل عنيك بالدمعه تشهق م التعب

لكن في قلبك دقة الراحه الشريفه والقبول

كل اللي كان زيك رسول

كل اللي قال إن الأصول.. لازم تكون هي الأساس

لا انداس في يوم إسمك بحرف ضلاله أو سيرة فلوس

ولا كنت غير الزوج لأم الشوق

تريزا ..على الدروب

في الدفن كان كفنك عرق مع أورده

مع دق من كل القلوب

واستقبلك مليون ملاك

بين السما والأرض..كانوا فرحانين من طلعتك

من طلتك على مصر من سابع سما

ما تقوللي مين غيرك سما

والكل ناهب في جيوب الغلبانين المطحونين

والكل ما بيعرفش غير رب الدهب

والكل لابس في عباية كدب..

نايم في معية أبو لهب

آه يا مشالي يا إسم فوق شالي اللي نفسه يلمسك

آه يا مشالي الرب لسه بيحرسك

فارس نحيف الهيئة ..لكن تحت باطه كل أوراق الخلود

إسمه بيملى الكون وبيخطي الحدود

راكب على مليون فرس

مادد إيديه للكل رغم شحوبه..

وهدومه القديمه والهزال

البيت مفيش جواه عزال

ولا قرش حتى مصدي سابه للي جاي

إشرب مع كل الملايكه الشاي وعطر كل أنحاء الحياه

قضيت كذا مليون سنه ..

اللحظه فيهم يا حبيب القلب..

تشبه للصلاه

الكل تاه ..

في جمع مال من غير عدد

إلا انت يا صاحب المدد

إلا انت يا اللي قضيت سنين عمرك سند

للمحتاجين.. تلتين رغيف

أو حتى نص سميطه تغني عن السؤال

ها يجينا زيك ..لا..محال

وانت اللي كاسر كل قانون البشر

هو انت مين يا اللي القمر ..

كان كل يوم يدخل عليك الأوضه ويبوسك

ويتعطر ليلاتي بريحه تشبه زعفران

ويعود يخلي الدنيا تفرح بالضيا

مين اللي يقدر يوم يقول عنك.. مشالي الحب.. مش م الأوليا

أو مش حبيب الأنبيا

سيبت الفلوس للأغبيا

المدقوقين جوه الجيوب

إسمك وشم يا مشالي فوق كل القلوب

وهواك وصل وياك لكل الأرض..

كل الأرض باركت مولدك

لافقر أبدا هددك

ولا كنت إلا الآيه ماشيه في اتجاه المطحونين

الطين صبح في إيديك عجين..

وحنين لسهره مع الرفاق..

المحتاجين شمة هوا

آه يا دوا للروح يا قنديل الهوا

آه يا مشالي الثوره ضد الموجودين بيننا غلط

ضد اللي لسه بيحدفونا بالزلط

وبيسلبونا القرش في عز الجفاف

يا ما أكلت اللقمه حاف

ياما وقفت على الضفاف بهدوم قديمه..

لاجل تغزل للي جاي هدمة شفا

الله خلق وياك ضياك

واعطاك بقايا شعله من ريحة حبيبنا المصطفى

وحباك بمصباح الدخول على حضرته

كنت الزعيم في حضرته

حاولت ياما معانا نتعلم لغاك

لكننا خدنا الترف لبحور بعيده..

بعيده عن شط النجاه

علمتنا معنى الصلاه فهربنا منك للاذاعة..

والشاشات السوده.

والشهره الحرام

لفيت على بطنك حزام

واحنا خلاص..

ضاقت هدومنا علينا من كتر الشبع

فهمتنا إن الطمع مالهوش لزوم

فسمعت صرخة زوم بترعش في الفضا

تفضى جيوبك كل يوم وتقول رضا

والتاني لسه بشوق بيشفط في دما الفقرا..

اللي عايزين الخروج م القوقعه

انت المقدس..

واللي خان المهنه هو الضفدعه

هوا اللي مش ممكن هايشبع م الدهب

قلبك وهب ليك القناعه..

والمناعه م الخروج م الصومعه

ونجيب منين زيك..

يا قنديل الأرامل واليتامى في الحواري الضيقه

ونجيب منين زيك بقى

وانت اللي مبعوث العنايه..

والشفا من حضرته

وانت اللي حامل كلمته..

للكل يمكن يلتزم

بس الجميع عايز رزم

ومفيش ضمير ..ومفيش خجل

ومفيش إيمان في القلب بوجود الأَجَل

الكل عايز بالعَجَل..

يصبح على التل الهلالي من الياقوت

الله عليك يا فرع توت يشبع ولادنا الأبريا

الله عليك يا أغنيه.. ما حد يقدر تاني يكتب حرف واحد منها

ده لأنها..

من عند رب الكون يخلد بيها إسمك عندنا

واحنا مفيش غير الخواء والإنحناء.. للغير يا صاحبي عندنا

حاربنا بعض بجهلنا

وسرقنا حتى في المداس من بعضنا

وطفينا شمعه من كيسة حب

في عز الصلاه

ورمينا ألف جنين على باب الجوامع كلها

آه يا دناوة النفس آه يا ذلها

آه يا أنين أرواح ومين..

ع السكه تاني يدلها

ويقولها

إنك مازلت معانا بتداوي جراح اللي إنكوُوا

واللي إنطوُوا..

في موجة الفقر اللعين

إديني ربع جنيه أجيب بيه العلاج

إديني حته م الروايح ..تاج مزوق جبهتك

للرب كانت وجهتك

وقضيتك ..إسعاد غلابه مدمرين

مين انت مين.. ؟

يا ابو القميص مزروع رقع

وقع اللي خان مغشي عليه.

ساعة ما شافك سد في وجه الحرام

وإمام لكل المنبوذين م المجتمع

يا بو القميص مزروع رقع

إيه يا مشالي مصر مين غير الإله.. هو اللي قالك هاصطفيك

واوهب إليك كل النعم

رديت عليه وبصوت حرير..

يارب يا رحمن نعم

فجأه ابتديت ..

تفرش هدومك للرفاقه الغلبانين

المطحونين تحت القادوس

ولغيت يا صاحبي م القاموس كلمة فلوس

ما فضلشي جوه الجيب سوا ريحة فراغ

بس اللي كان وياك قبيله بتعشقك

وانت اللي كنت إمام لكل العاشقين من منشأك

في الدفن روحك رفرفت

زي اليمامه الخضره حاضنه في السحاب

شالوا الصحاب النعش كان وزن الحرير

الله على صوت الضمير..

لو غطا فوق صوت الأطبا اللي ابتدوا يتحولوا لغوريللا سوده مدنسه

الله على الروح اللي لسه مقدسه ومؤسسه

ومحسسه الدنيا بقانون الحياه

ييجوا الغلابه يقولوا آه

تفتحلهم..

وانت اللي عايز حد تاني يسندك

لحظة شفاهم تسعدك

سبحانه للفقرا الحزينه أوجدك

سبحانه بين كل الخلايق سيدك

يستنجد الغلبان بنورك تجري نص الليل عليه

بسمة عنيك يا حبيبي 100 فدان نبق

وضياك بيملا الدنيا بالياسمين..

ويصبح كالسحابه الممطره

قدام طابور..

لسه بيكنس في الياقوت والفضة والمرجان ..ورا

كانت ضلوعك للغلابه قنطره

سهران على راحة ولايا مدمرين

ولا لك جيوب في البطلون ولا في القميص

ولا لك حساب في البنك يسند فيك في شيخوختك..

يا عالم بالأمور

إنت تاجرت مع الإله

ورفضت في فلوس المساعده..

من جميع الأغنيا

مش قولتلك إنك نبي م الأنبيا

وإنك حفيد السيده زينب

حفيد السيده نفيسه

حفيد سيدنا النبي

وإنك حفيد كل الرسل

غلبان ولكن عبقري

واهب حياته للغلابه والأرامل والسهر

صوتك قمر

والرب راسم هيئتك

والهيئه لايقه عليك برغم نحالة الجسم الضعيف

آه يارغيف الصبر سخن لكل سكان

الجحور

من غير ما تدرى كشفت طب الزور..

وتقطيع الجيوب

من غير ما تدرى وصلت في كل القلوب

وسحرتنا

إنت الطريق المستقيم..

واحنا يا صاحبي المنحنى

واللي انحنى للطين..

طبيب مالهوش ضمير

يا مشالي

يا قلب الحرير

قلب الرخام بيننا انتشر

سيطر بقوه على البشر

فضحكت لما لمحت ألف عياده دابحه في المريض

وطبيب عريض في الطول وفاقد ملمحه

قصره ما زال بيسلحه

بالكدب والطمع الرهيب

آه يا مشالي يا حبيب

آه يا طبيب كل اللي داس فوق القزاز

كل اللي قلبه اتهان ليلاتي م العزاز

كل اللي دق الباب عليك يا صديقي

نص الليل عشان حاسس ألم

في الودن مزروع القلم

في الجيب ورق

شيكولاته للأطفال وضحكه حنينه

نظرة عيونك يا مشالي سوسنه

وإيديك بتعزف طبطبه

فعلا بلدنا طيبه

في كل فتره طويله تولد لينا واحد عبقري

يقدر على حل الرموز

مصري ..وبعض أطبة العهد الجديد من غابه

في بلاد الدروز

ويجوز بأن الله بيضرب لنا في المثل الشريف

إنسان بيقسم في الرغيف

بينه وبين إنسان فقير

يا صاحبي.. يا أعظم إشاره للضمير

مين انت .؟. يا ابو العضم بيطقطق في ساعة مشيتك

والمشي كله يا صاحبي كان للمعدمين

مين انت .؟. هيقولوا ياسين

ولا 100 ياسين هيحصلوك

مبروك عليك الجنه يا قصر القصور

مبروك رضا الرب العظيم

مبروك رضا سيدنا الرسول

مبروك دخولك قبر..

كان القبر قايد بالضيا

وانت كأنك ضي من حضرتك جميع الأنبيا

هاكتب عشانك أغنيه..

إزاي .؟

وأقول في الغنوه إيه ؟

كان في العطاء باشا ..

وكان في الحب بيه ؟

هاكتب ياريتنا نكرمه بمليون وسام

وانت اندفن جواك جميع الأوسمه

مستنظراك والله أبواب السما

مستنظراك مليون سحابه ..

تبل ريقك في السفر

مستنظرك رب العباد

ومعاه رسول الحق لاجل يكرموك

هو انت مين يبقى أبوك ؟

سيدنا محمد والكتاب

يا اللي معاك من بدري..

أبواب العلاج للعاجزين

طيب ومين ..؟

طيب ومين يقدر يكون بعدك طبيب

يقدر يكون بعدك حبيب

وانت اللي كنت بدون دوا

بتخلي كل الناس تطيب

انت اللي كنت بدون دوا

بتخلي كل الناس تطيب