هصبَّحَك وأمسيك...

ولو تحب ممكن كمان أَفَطَّرَك وأغدِّيك

ولإني عارفة مواعيدك هعَشِّيك

حبيت أسلِّيك

بكلام يحرق كل وريد فيك

ما انت اللي بديت

ومن الشر ما اكتفيت

أَمَّا عن ضميرك...

الله يرحمه في السلة بإيدك رميت

ونرجع لموضوعنا....

دا كل اللي شاغلنا

ناخد حقنا

ومش هنسكُت على ظُلمنا

أيوا هنقَطَّع في فروِتٓك

وعلينا نهاية قصتك

بسم الله نقرأ ختمِتَك

عِدِّية يَس وإجابة دُعا المظلومين

أستعيذ بالله منك

ومن كل ظالم ساندك

ومن اللي بمَكرُه واقف جنبك

واللي خطط ودبَّر لك

ومن الشهود اللي من دمك

ومن اللي سرقوا خيري ونكروا

ومن اللي حسدوا وفي هدمي فرحوا

واللي سحروا وشعلوا النار

وقالوا مش احنا هو اللي اختار

واللي وقت الجد بلَّغ فرار

واللي اتصوَّر وعَيِّد ونصرك وأنا ب انهار

واللي زغرد ورقص وعمل زار

واللي طبِّل ونفخ مزمار

واللي دق بنعشي مسمار

وانت بتتفرَّج وتِتشَفَّى وشاهد الله القهار

حَضَّر نفسك للتعويذة

والساحرة وطقوسها اللطيفة

ما انت عارف قوتها

قول للشامتين إنها مش ضعيفة

خافوا ادخلوا الجحور

اتقوا شر الصبور

واحد واحد العقاب بالدور

انت أولهُم

الدايرة اتفتحت وفي الحفرة وقوعهم

التقسيمة متقسمة خانات

دي خانة المرض

دي خانة العرض

دي خراب البيت والشتات

دي الخَرَف ويا خسارة العقل ذكريات

له حكمة في خرق السفينة

لن تستطيع معي صبرا وفئتك اللعينة

والنَّفَس طويل وقلبي رميتُه في بير

أبواب السما تستقبل دموعي وبالفرح تبَدِّل

سبحانُه دي إرادتُه كُلُّه يِتعَدِّل

النجاح له ناسُه

والفشل لكل حقير الشأن صغير

باع شرفُه ودمُّه وعرضُه بدنانير

واقع اللي يتحامى في شوية خراف وبعير

والحشرات فوق الميَّه الراكدة مِسيرها تطير

مشوار كل خطوة فيه بتقدير

بقلم الشاعرة/حنان فاروق العجمي