الأدب
من ديوان (حب وحرمان )
أرجع بقى
سايبنى ليه متشوقة
الحب مش لوعة وآهات
لا ف يوم هدى ولا عمره مات
الحب عايش فى القلوب
والصبر أصبح محرقة
أرجع بقى
خدنى الحنين للذكريات
ورجعت أقلب فى اللى فات
حنيت اليك أشتقت ليك
وحشنى فيك كل الحاجات
خدنى الحنين للذكريات
حنيت لكلمة من كلامك
إشتقت ليك لحظة سلامك
وحشنى فيك حتى السكات
خدني الحنين للذكريات
وحشتنى نظرة من عنيك
حنيت للمسة من ايديك
تصحى احساسى اللى مات
خدنى الحنين للذكريات
أرجع بقى
سايبنى ليه متشوقة
مستنياك وهعيش معاك
كل الأمانى اللى فى هواك
صبحت خلاص متزوقة
أرجع بقى
هنرجع العمر اللى فات
كل اللى راح والأمنيات
وهاعد باليوم والساعات
أجمل ميعاد واجمل لقى
أرجع بقى
رجع لقانا من جديد
جدد هوانا الليلة عيد
يافرحة القلب السعيد
دا انا من زمان متهيأه
أرجع بقى
