الأدب
لسع عقارب 'بالعامية المصرية '
ولا وقته إننا نتحاسب
ولا وقته إن انت تعاتب
لكن كل اللي هيسألني هجاوب
مش هقول مين فينا ظالم
ولا مين كان مظلوم
ولا هغامر خسرانة البيعة
ولا عندي استعداد لأي كلام سالب
لكن هقول إنك لحقي حاجب
هقول إنك بياع وملكش عزيز
واعتبر كلامي ف حقك عليَّ دا واجب
ما انا ياما شفت سنين ف قربك
كل الحلو قلت عليه مُر وشارب
ما بالك لما بعدنا
هتيجي تحايل وتطبطب
وتقول مغلوب على أمرك
وأنا اللي قوية ومستقوية
وف الآخر هطلع غالب!
يعيني عليك !
ضاع حقي على اديك
وعصارة تعبي لا عاد ليها قيمة
ولا له ثمن وجع قلبي
ونجاتي غرقانة ف محيط شرك
لا لاقية شراع تتعلق فيه ولا قارب
أعرف سم النحلة له فايدة
لكن من امتى كان دوا لسع العقارب!
قال كان بيعمل علشاني !
وحطمت أنا روحه !
قام لف بظهره وراح غايب !
احكموا بينا تعالوا احضرونا يا حبايب
دا حتى حيطان البيت شهدت عليه
وعلى حبه اللي كان سكر ف شاي دايب !
قال تمشي ترجع
مش طايق أعيش ف السجن
وسجانه بيفكرني بذنبي
دي قاعدة بتحكي حقايق
رافعة اديها بتدعي
وتقول الله غالب الله غالب
وانا أكد وأقولك
قلبي له باب لكنه اتقفل و معدش موارب
‘‘‘‘‘‘‘‘‘‘‘‘‘‘‘‘‘‘‘‘‘
بقلم: حنان فاروق العجمي
